Hopp til innhold

Om PST

Politiets tryggingsteneste (PST) har som oppdrag å forstå, formidle og motverke dei mest alvorlege truslane mot tryggleiken i riket. PST er både ei etterretnings-, tryggings- og polititeneste. Oppgåvene våre er derfor mange og varierte.

PST skal

  • overvake og analysere innanlands truslar mot nasjonale tryggingsinteresser

  • førebyggje og etterforske truslar mot tryggleiken i riket

  • utarbeide analysar og trusselvurderingar

  • forstå og formidle trusselbiletet

  • beskytte myndigheitspersonar

Slik jobbar vi

Trusselbiletet og formidling av dette

Som Noregs innanlands tryggings- og etterretningsteneste skal PST forstå kva som truar Noreg no og i tida framover. PST formidlar så dette trusselbiletet til avgjerdstakarar og befolkninga og skal tryggje nasjonen gjennom å førebyggje, avdekkje og avverje dei same truslane.

For å kunne danne oss dette trusselbiletet samlar vi inn og analyserer informasjon om personar og grupper som kan utgjere ein trussel. Sidan det er snakk om truslar, er hovudtyngda av arbeidet retta mot situasjonar der det enno ikkje har skjedd noka hending eller nokon aktivitet. Dette står i motsetnad til tradisjonell etterforsking, der hendingane allereie har skjedd.

Vi har unike verktøy for å løyse dette oppdraget. Vi bruker desse verktøya med stor varsemd fordi dei kan vere inngripande i den personlege fridommen til den det gjeld.

Beskyttelse av myndigheitspersonar

PST har òg ansvaret for livvakttenesta for norske myndigheitspersonar og for utanlandske myndigheitspersonar på besøk i Noreg. Myndigheitspersonar er medlemmene av Kongehuset, regjeringsmedlemmer, stortingsrepresentantar og dommarar i Høgsterett. I tillegg kjem tilsvarande representantar frå andre land og frå ambassadane andre land har i Noreg. PST har òg bilteneste for regjeringsmedlemmer.

PSTs oppgåver, organisering og bruk av tvangsmiddel i førebyggjande verksemd er regulerte i politilova kapittel III a (§ 17 a til 17 f).

PST har unike rammer, heimlar og verktøy

PST er Noregs innanlands tryggings- og etterretningsteneste. For å løyse samfunnsoppdraget vårt og motverke dei mest alvorlege truslane mot tryggleiken i riket har vi unike rammer, heimlar og verktøy som berre PST har.

Sidan desse verktøya kan vere inngripande for personane det gjeld, må vi vere sikre på at vi bruker verktøya på rett måte og med stor varsemd. Derfor finst det lover og rammeverk for arbeidet vårt som vi rettar oss etter.

Nedanfor finn du ei oversikt over rammene og retningslinjene vi rettar oss etter. Lenger ned på sida kan du lese om korleis PST blir kontrollert og regulert.

Slik er PST organisert

PST er eit politiorgan og ein del av politietaten, men vi er politifagleg og administrativt direkte underlagde Justis- og beredskapsdepartementet. Riksadvokaten har det overordna ansvaret for etterforsking og straffesaksbehandling, og Det nasjonale statsadvokatembetet (NAST) har påtalefagleg ansvar.

Politi- og lensmannsetaten i Noreg er

  • Politidirektoratet
  • Politiets tryggingsteneste (PST)
  • 12 politidistrikt
  • særorgan
  • nokre andre einingar med nasjonale oppgåver

I tillegg er Svalbard eit eige politidistrikt, der Sysselmeisteren har myndigheit på lik linje med ein politimeister på fastlandet.

Justis- og beredskapsdepartementet har ansvaret for den overordna styringa av politietaten.

Nokre av samarbeidspartnarane våre

Politiet

Etterretningstenesta

Nasjonalt tryggingsorgan (NSM)

PST er på plass i heile landet

Hovudkontoret til PST, den sentrale eininga (DSE), ligg i Oslo. I tillegg har vi medarbeidarar i alle politidistrikta i landet som jobbar med alle ansvarsområda våre. Distriktseiningane hentar inn informasjon, gjer vurderingar og set i verk tiltak med basis i den unike kunnskapen dei har om lokalmiljøet, og ut frå ein tett dialog med lokale samfunnsaktørar.

Tilsette i distriktseiningane er fagleg underlagde sjef PST, men er administrativt underlagde politimeisteren i sitt bestemte distrikt og er tilsette i politiet.

Kontaktinformasjon til distriktskontora til PST

Den øvste leiinga i PST

Sjef PST er verksemdsleiar for den sentrale eininga (DSE) og har det faglege ansvaret for distriktseiningane til PST. Dei lokale politimeistrane, med unntak av politimeisteren i Oslo og Sysselmeisteren på Svalbard, er ansvarlege for verksemda til tenesta i kvart sitt distrikt, men under fagleg leiing av sjef PST. PSTs hovudkontor er ansvarleg for verksemda til PST i Oslo.

Strategien vår

  • Strategien avgjer korleis vi skal løyse samfunnsoppdraget vårt

    Han fastset retninga for korleis tenesta skal utvikle seg dei kommande åra. Strategien har tre overordna mål.

  • PST forstår trusselbiletet

    PST har oversikt over det nasjonale trusselbiletet i heile krisespekteret. Vi har relevante kapasitetar og effektive prosessar som sikrar at vi har informasjon vi raskt kan omsetje til vurderingar. På denne måten forstår vi det til kvar tid gjeldande trusselbiletet.

  • PST formidlar trusselbiletet

    PST er ein synleg samfunnsaktør som bidrar til ei felles nasjonal situasjonsforståing om trusselbiletet. Trusselformidlinga frå PST set andre samfunnsaktørar i stand til å beskytte seg mot truslar og er med på å gjere samfunnet meir årvakent. Slik bidrar PST til å beskytte demokratiet og kritiske samfunnsfunksjonar.

  • PST motverkar truslar

    PST har unike heimlar for å kunne setje i verk inngripande metodebruk overfor befolkninga i landet for å motverke truslar. PST forvaltar dette på ein tillitvekkjande måte og i tråd med rammene som er gitt oss.

Kven kontrollerer PST?

Fleire instansar kontrollerer PST: Stortinget, Riksrevisjonen og Det nasjonale statsadvokatembetet kontrollerer PST jamleg og ser til at verksemda blir driven innanfor dei gitte rammene. I tillegg fører domstolen kontroll, sidan PST treng godkjenning frå retten for å kunne bruke visse metodar.

Lover og instruksar vi må følgje

Personopplysningar og innsyn

Les meir om etterforsking og påtale

Årsrekneskap

Bandlegging av terrormidlar

Få oversikt over bandleggingssaker vi jobbar med no.

Ønskjer du å klage?

Alle som meiner at PST har gjort urett mot dei, kan klage til EOS-utvalet.